Ustekabe Fanfarrea » aktuazioak

Gabonetako emanaldia ostegunean, Eibarko kaleetan

josu — Tue, 20 Dec 2011 15:45:53 +0000

Ustekabe fanfarreak Eibarko kaleak alaituko ditu datorren ostegunean, hilak 22, Gabonak direla-eta egingo den hiru orduko kale animazioaz. Aktuazioa, ohiko bilakatu den bezala, Estaziño kaletik hasiko da eta bertatik abiatuta Untzagarantz abiatuko da fanfarrea, horretarako Estaziño, Errebal, Julian Etxeberria eta Toribio Etxebarria kaleak zeharkatuz. Kalejira eta kale animazio hau arratsaldeko 18.30etan hasiko da, esan bezala, tren geltoki aurretik abiatuta eta Untzaga Plazaraino. Horrez gain Ego-Gain eta Kalbetoi kaleetan ere arituko da fanfarrea.

Horrarte, ohiko ibilbideari dagokionez. Baina horrez gain beste kale batzuetatik ere pasako dira musikari eibartarrak: Bista Eder eta Ifar Kale kaleak, Zuloagatarren, San Agustin, Bidebarrietatik Urkizura egingo den jeitsiera. Kale guztiak zeharkatzeko hiru ordu izango ditu fanfarreak, emanaldia arratsaldeko 9.30etan amaituko baita, Urkizu inguruan ziurrenik.

Aktuazio hau Eibar Merkataritza Gune Irekia elkargo publiko-pribatuaren ekimenez izango da, eta Ustekabe fanfarrearen 2011. urteko azken aktuazioa izango da hau, hurrengo aktuazioa hilabete beranduago izango delarik. Hainbat dira Ustekabek 2011. urtean zehar Eibarren egin dituen aktuazioak: danborrada, Sanandresak, Kaldereroak, Aratosteetako larunbata… eta baita Eibartik kanpoko aktuazioak: Zaldibar, Mungia, Elgeta, Matiena, Bergara, Bermeo, edo Errioxako Castañares-eko kanpina, besteak beste. Azken urteotan baino aktibitate handiagoa ari da izaten aurten Ustekabe udatik hona: irailean Bermeon eta Bergaran izan zen, eta Sanandresetan jo ondoren, berriro irtengo da kalera abenduan.

Urtarrilerako eta otsailerako emanaldi gehiago dauzka programatuta Ustekabek. Laster emango dizuegu horien berri. Bitartean, ZORIONAK ETA URTE BERRI ON!

Kalejira larunbatean: sanandresak eta kilometroko txistorra

ustekabe — Thu, 24 Nov 2011 22:07:55 +0000

Udan jairik jai ibiltzen garenez, udazken hasieran egin ohi ditugu oporrak, eta Sanandresekin ekiten diogu ikasturte berriari. Halaxe izango da aurten ere: krisiak aurrekontuak gogor jo arren, Txirrindulari Elkarteak berriro ere egingo du kilometroko txistorra larunbatean, eta guk ere hor egon nahi izan dugu.

Horretara, larunbat arratsaldean kalejira bat egingo dugu arratsaldeko 7etatik aurrera. Ohi baino laburragoa izango da, ordubete inguru, baina horrekin kaleko giroa apur bat berotuta utziko dugulakoan ekingo diogu. Kalejira arratsaldeko 7etan hasiko da Estaziño kaleko tren geralekutik, eta bertatik Toribio Etxeberria (Dos de Mayo) kalera joango gara. Kale animazioa Toribio Etxebarria, Untzaga plaza eta Kalbetoi kaleen inguruan egingo dugu, poteo-gunean hain zuzen.

Ikasturteari hasiera honekin emanda, laster beste aktuazio batzuk iragarriko ditugu.

Euskal Jaia Errioxan larunbatean

josu — Tue, 26 Jul 2011 09:06:44 +0000

Duela 6 urtetik hona urtero Euskal Jaia antolatzen dute Castañareseko kanpinean (Errioxa). Euskal Herritik kanpo badago ere, kanpinean dauden lagun gehienak euskaldunak dira, baita kanpinaren jabeak, eta 2005. urtean San Inazioekin batera Euskal Jaia antolatzeari ekin zioten. Aurtengoa zazpigarren edizioa izango da, datorren uztailaren 30ean, larunbata.

Euskal jaia… Errioxan! Sekula Ezkaraira joan izan direnek ezagutuko dute bidean hainbat bandera dituen kanpina, Haro eta Santo Domingo herrien artean, erdi-erdian, Casalarreina eta Castañares artean dagoen kanpina.

Goizeko 11ak inguruan hasten dugu jaia, kanpineko kaleetatik diana bat eginez, oraindik lo daudenak esnatzeko asmoz. Kalejira hori udako tabernan bukatzen dugu, non bazkalordurarte ingurua girotzen jarraitzen dugun.

Bertara iristen garenean, eguerdi aldera, sagardo kupela irekitzen da. Edalontzia erosita, nahi beste sagardo edateko aukera dago. Horretarako sagardotegi mugikor bat eramaten dute Saizar sagardotegikoek.

Geroxeago urtero pertsona desberdin batek Ikurriña hagan ipintzen du, eta horren ondoren pintxo lehiaketa egiten da. Horrekin gosea pizten denez, jarraian herri bazkaria egiten dugu. Euskal Jaia bada ere, Errioxan gaudenez gero, patatak errixoar erara izaten ditugu lehen plater gisa (doan), eta bigarrena norberak etxetik eramandakoa.

Bazkariaren ondoren ekintza desberdinak izan ditugu urtez urte: Gorriti eta bere animaliak, bigantxak, herri kirol erakustaldiak, zanpantzarrak… aurten Adolfo Jainaga trikitilariaren erromeria izango dugu, 3 orduz, bazkaldu ondoren.

Asteburuko aktuazioak: Zaldibar eta Mungia

josu — Thu, 07 Jul 2011 15:01:38 +0000

Joan den asteburuan Elgetako jaietan izan ondoren, oraingoan Bizkaira salto egingo dugu bertan udako aktuazioekin jarraitzeko:

Zaldibarko jaiak

2011ko uztailaren 8a, ostirala

Iaz egin genuen bezala, aurten ere Zaldibarko jaietan izango gara, arratsaldeko 6etan hasi eta 3 orduz. Egitarau osoa Zaldibarko Udalaren webgunean duzue.

Mungiako jaiak

2001ko uztailaren 9a, larunbata

San Kristobal jaiak direla eta, kalejira egingo dugu iluntzeko 9etatik aurrera.

Ustekabe, Elgetako jaietan

josu — Fri, 01 Jul 2011 12:38:07 +0000

Ustekabe fanfarrea aurten ere Elgetako jaietan izango da, laugarren urtez jarraian

Data: 2011ko uztailaren 2a, larunbata
Ordutegia: 11.00-14.30 eta 17.00-21.00
Jaia: Herri Eguna, Ferixa Nagusixak 2011

Emanaldia goizeko 11etan egingo den diana batekin hasiko da, ordu erdi geroago, 11:30etan, hamaiketakoa egiteko herriko plazan. Indarrak hartu ondoren, kalejira egingo dute musikari eibartarrek bazkalordura arte.

Eguerdiko 14:30ak inguruan herri bazkaria izango da plazan edo frontoian (iaz, euria zela eta, frontoian izan zen). Bazkarirako paella erraldoia egiten dute Elgetan.

Bazkal ondoren, arratsaldeko 17.00etan zezenak izaten dira herriko plazan, eta bigantxetan musika jartzen du Ustekabe Fanfarreak plazako eszenatokitik. Behin ekitaldi hau bukatuta, iluntzerarte kaleak alaitzen jarraituko du Ustekabe fanfarreak.

Elgetako jaietako aurrekontua publikoa da, Elgetako Udalak jaietako programan jartzen baitu ekintza bakoitzaren kostua. Elgeta.org webgunean kontsultatu daiteke aurrekontu hori.

Ustekabe fanfarreak eskerrak eman nahi dizkie elgetarrei, Elgetako Udalari eta Jai Batzordeari, 2008tik hona urtez urte fanfarrearengan jarritako konfidantzagatik. Gu oso gustora joaten gara Elgetako jaietara, eta giro ona nagusi dela konprobatu ahal izan dugu azken urteotan. Jaiak gaur hasi eta igandera bitartean izango dira:

Ekainak 30, osteguna: mozorro eguna
Uztailak 1, ostirala: erretiratuen eta umeen eguna
Uztailak 2, larunbata: Herri eguna
Uztailak 3, igandea: Ferixa Nagusia

Kaldereroak 2011

ustekabe — Mon, 07 Mar 2011 09:44:24 +0000

Pasa den ostiralean 20. urtez egin genituen Eibarko Kaldereroak, 1991an berreskuratu baitziren. Ostiraleko aktuazioaren bideo bat aurkitu dugu Youtuben.

Eskerrik asko Kezka Dantza Taldeari urtero antolakuntzan hartzen duen lanagatik eta, berriro ere, gurekin ospatu izanagatik.

Aratosteak 2011

ustekabe — Fri, 04 Mar 2011 08:58:00 +0000

Gaur arratsaldean kaldereroetan parte hartu ondoren, bihar arratsaldez berriro ere irtengo da Ustekabe fanfarrea Eibarko kaleak alaitzera. Erdialdetik Urkizura jeitsi, eta arratsaldeko 8etan Urkizutik berriro ere Toribio Etxebarria kalera igoko gara kalejiran. Guztira, 3 orduz arituko gara kalez kale, hainbat musika estilo jorratuz: kalejirak, mexikanadak, pasodobleak, rock, ska… guztira ehun kantu inguruko errepertorio zabala baitu Ustekabek.

Ustekabe fanfarrearen lehen aktuazioaren 10. urteurrena betetzen da, hain zuzen ere, aurtengo aratosteetan; izan ere, estreinua 2001.eko aratosteetako ostegunean izan zen, duela 10 urte. Tarte honetan elkarte eta erakunde askori eskerrak eman beharrean aurkitzen gara. Aratosteetan, bereziki Eibarko Udalari eta Kezka Dantza Taldeari, baina oro ar Eibarko herri guztiari.

Aktuazioak:

Ostirala, martxoak 4, 19.30. Kaldereroak. Urkizutik Untzagara, Eibar.
Larunbata, martxoak 5, 18.00-21.00. Eibar.

Duela 3 urteko Aratosteetako pregoia, 2008an, Ustekaberen eskutik

Gasteizko jaiak, gaurtik aurrera

ustekabe — Wed, 04 Aug 2010 02:23:44 +0000

Gaur, abuztuak 4, Gasteizera goaz urtero bezala Los Alegrios blusa eta neska koadrilarekin batera bertako jaietan jotzera. Gaur arratsaldean izango da Celedonen jeitsiera, eta bihar hasiko ditugu aktuazioak.

Ustekabe Gasteizen. Iturria: Los Alegrios

Abuztuaren 5ean goizeko 9etan hasiko gara eta bazkalordurarte joko dugu. Tartean, Andre Zuriari loreak eramatera lagunduko ditugu gure blusa eta neskak, eta Nagusien Egoitza batera ere joango gara bertara ere musika eramatera.

Bazkal ondoren, Gasteizko jaietan egunero izango dugun plana hasiko dugu: arratsaldeko 5etan joaneko paseiloa Dato kaletik, eta arratsaldeko 8ak pasata itzulerako paseiloa, Dato edo Independentzia kaletik. Afal ondoren, gauerditik goizaldeko 3retara ere joko dugu egunero.

Paseiloetan 23 koadrilak hartzen dute parte, eta egunero ez gara ordena berean irtetzen. Zozketa bat egiten dute Blusa eta Nesken Batzordean, eta horren arabera erabakitzen da zein postutan irtetzen garen egun bakoitzean. Jatorrak koadrilaren blogean ikusi dugu ordena:

Abuztuak 5: joateko 19.ak eta itzultzeko 7.ak Dato kaletik.

Abuztuak 6: joateko 18.ak eta itzultzeko lehelengoak Independentzia kaletik.

Abuztuak 7: joateko 22.ak eta itzultzeko 12.ak (azkenak) Dato kaletik.

Abuztuak 8: joateko 18.ak eta itzultzeko 2.ak Independentzia kaletik.

Abuztuak 9: joateko 22.ak (azkenaurrenak) eta itzultzeko 2.ak Dato kaletik.

Azkenengo 5 postuetan goaz joaneko paseiloetan egunero. Zozketa hauetan ez dugu zorte handirik izaten eta agian zozketa sistema aldatzea pentsatu beharko lukete Blusa Batzordean. Izan ere, gero eta atzerago irten, orduan eta gehiago luzatzen dira kalejirak, eta gogorrak egiten dira oso.

Esan bezala, 23 koadrilak hartzen dute parte, eta gehienek txaranga bana daramate. Beste batzuk, txistulari taldearekin joaten dira, baina gaur egun gehienek txaranga daramate iaz ETBn azaldu ginenean kontatu zuten bezala.

Hauek dira parte hartzen duten 23 koadrilak: Belakiak, Bereziak, Gasteiztarrak, Luken, Okerrak, Zintzarri, Biznietos de Celedón, Karraxi, Desiguales, Batasuna, Los Bainas, Jatorrak, Petralak, Zoroak, Galtzagorri, Los Alegrios, Basatiak, Txirrita, Txolintxo, Nekazariak, Txinpartak, Hegotarrak eta Martinikos.

Aurtengoa 7. aldia da Ustekabek Gasteizko jaietan parte hartzen duena (2008, 2009). Beti egon gara Los Alegrios koadrilarekin, 2004. urtean estreinakoz joan ginenetik. Gasteizko jaiez gain, Eibarren, Elgetan, Zaldibarren eta Errioxako Castañareseko kanpinean ere izan gara aurtengo udan. Santiago egunez, Blusa Egunean ere izan ginen Gasteizen.

Interesekoa:

Nola sortu ziren blusa koadrilak?
Prentsa oharra gaztelaniaz (pdf)
El Diario Vasco
El Correo. Horrekin batera, Ustekaberen 10 urteei errepasoa.

VI. Euskal Jaia 2010, Camping de La Rioja

josu — Fri, 30 Jul 2010 10:34:24 +0000

6. urtez Euskal Jaia egingo dute bihar Errioxako Castañares herrian dagoen kanpinean. Haro eta Santo Domingo dira inguruko herri ezagunenak, eta tartean dauden Casalarreina eta Castañares herrien erdian dago kanpin hau, Ezkaraira bidean: Camping de La Rioja. 2005. urtean izan zen Euskal Jaiaren lehen edizioa, eta ordutik urtero egon izan gara bertan.

Fanfarrearen aktuazioaz gain, trikitilariak, pintxo lehiaketa eta sagardo kupela izaten dira. Beste batzuetan bertan izan dira, baita ere, Gorriti eta bere animaliak edo Bihurri aizkolariarekin herri kirolak.

Blusa Eguna 2010, there we go!

josu — Sun, 25 Jul 2010 03:13:37 +0000

Gaur, Santiago egunez, jaiak dituzte Eibar inguruko hainbat tokitan. Goimendi (Elgeta-Bergara), Ermua eta Soraluze (Santanak) besteak beste. Baina horietaz aparte, ospakizun dexente dago gaur Euskal Herri osoan zehar; besteak beste honako herrietan daude jaietan:

Billabona, Busturia, Derio, Astigarraga, Tutera, Gares, Gorliz, Elizondo, Donapaleu, Soraluze, Barakaldo, Pasai Donibane, Ispaster, Etxebarria… eta baita Ordizia eta Gasteiz.

Duela urte batzuk izan ginen Ordiziko jaietan, eta 2004tik hona urtero izan gara Gasteizen. Gaurkoan ez dute gauza bakarra ospatzen, bi dira gaurko egunez Gasteizen ezagunen diren bi ekitaldiak:

Berakatz (baratxuri) azoka
Blusa eguna

Nondik datoz Gasteizko blusak? Azalpena iaz eman genuen.

Goizeko 7,45etan gaude geratuta, izan ere 9etan hasiko gara jotzen Gasteizko erdialdean eta gure doinuek gauerarte beteko dituzte Gasteizko kaleak. Aktuazio oso gogorra da, oso luzea, baina baliagarria baita ere Andre Zuriaren jaietarako prestatzeko, abuztuaren 5etik 9ra Gasteizen izango baikara aurten ere, eta hori ere ez da makala izango.

Blusa eta Nesken koadrilen komisioak prestatu duen egitaraua Los Alegrios koadrilaren blogean.